محتاج تذاكر كويس وتعرف أنت بتتكلم عن مين

حرصت السيدة شيرين عادل، الدفاع عن زوجها المطرب رامي صبري بعد أن هاجمه مطرب الراب ويجز، وذلك من خلال منشور عبر حسابها الشخصي على موقع تبادل الصور والفيديوهات إنستجرام.

شيرين عادل تدافع عن زوجها رامي صبري

وكتبت شيرين عادل في منشورها الذي يرصده موقع تحيا مصر: ده جزء من الحلقة اللى رامى اتكلم فيها عن الراب.. ومن هنا ورايح مش هسكت وهرد على أي حد يفكر يتكلم عنه تاني بأي طريقة مش عجباني.. أولًا رامي اتسال سؤال في برنامج ورد وعنده كل الصلاحية لأى رد أو إجابة على أي سؤال يعني مفيش أي مانع يخلي رامي لما يتسأل سؤال ميجاوبش وثانيا رامي صبري ده يا حضرت فنان من أهم الفنانين في الوطن العربى ومن أهم الأصوات ده لو حضرتك مش معانا في مجال المزيكا وبعدين والله يا ريت رامى عنده الوقت بتاع حضرتك الفاضى اوى بتاع ٥ شهور فاضى يا ريت كنا نتمنى.

زوجة رامي صبري لـ ويجز

وتابعت: أما بقى موضوع رامي رقم كام ده هو الحقيقة مش شاغل بال رامى أوي بس لو حضرتك شايف إن رامي رقم ١٩ مع الأسف الشديد لازم أقول لحضرتك تبقى أنت مش موجود على الخريطة من الأساس.. أغنية واحدة من رامى صبري واحدة بس تعمل تاريخ لناس، محتاج تذاكر كويس وتعرف انت بتتكلم عن مين، قبل ما تتكلم لأنك واضح إنك عندك شغل تانى غير المزيكا لأنك لو جوة الشغلانة كنت مش هتقول ولا كلمة من الكلام دة علشان الناس متضحكش عليك لأنك اتكلمت عن فنان بجد مش جاى يهزر، واخيرًا لما تحب تعمل دعاية لأغنيتك الجديدة ابعد عن اسم رامى صبري أنا عارفة إن اسمه ممكن يخلى الأغنية ترند بس حاول الأغنية بتاعتك الجديدة تعتمد فيها على نفسك.

ويجز يهاجم رامي صبري

وسبق وأن خرج مطرب الراب الشهير ويجز للهجوم على رامي صبري بعد حديثه عن مطرب الراب في آخر لقاء تلفزيوني له والذي تم عرضه أمس الجمعة، مشيرا إلى إنه لا يفهم في الراب شيء مثلما صرح فمن واجبه أن يحترم النجوم الذين يعملون به.

وقال ويجز في فيديو رصده موقع تحيا مصر عبر حسابه الرسمي بموقع تبادل الصور والفيديوهات انستجرام عبر خاصية ستوري: هتكلم على فنان فاكر انه عنده الصلاحية انه يطلع يتكلم عن اى حد فى اى وقت والناس تسمع وتسكت .. الفنان دا اسمه رامي والفنان دا كل ما بيقعد من ٤ لـ ٥ شهور يزهق ويطلع يتكلم على بتوع الراب فى التليفزيون، هتكلم امتي على بتوع البوب اللى انت منهم.