بسنت أمام محكمة الأسرة: زوجي غطاس والأجنبية أحلى مني وخطفت قلبه

في محكمة الأسرة بالقاهرة، وقفت بسنت، سيدة في أوائل الثلاثينات، تحكي قصتها بحزن وألم عن زواجها الذي انتهى بمفاجأة صادمة. 

بدأت حديثها قائلة: "أنا متجوزة من 4 سنين، سبت أهلي في القاهرة وانتقلت مع جوزي للسويس، علشان نعيش حياة مستقرة ونبني بيتنا. معايا ولد وبنت، وكنت مستعدة أضحي بأي حاجة علشان أسرتي."

قصة علاقتها مع زوجها قبل الزواج منه

تعرفت بسنت على زوجها، الذي يعمل غطاسًا، أثناء حضورها فرح صديقتها، وبعد فترة قصيرة من التعارف، تقدم للزواج منها. "كان في الأول راجل طيب وحنين، لكن مع الوقت اتغير. بقى عصبي وبيزعق كتير، وأحيانًا كان يمد إيده عليا بدون سبب واضح. لما واجهته، قالي إن أمه كانت بتتحمل كده من أبوه طول حياتها."

محاولة الحفاظ على البيت

رغم الخلافات، حاولت بسنت تحافظ على بيتها، خصوصًا بعد ولادة أطفالها. لكن الأمور أخذت منحى آخر تمامًا لما اكتشفت إن زوجها حب ست أجنبية. بتحكي: "عرفت إنه أنقذ واحدة أجنبية من الغرق أثناء شغله، ومن يومها هي سيطرت على دماغه. بدأ يقول لي إنه عايز يسافر برلين يتجوزها، وبيوعدني إنه هيبعت لنا فلوس كل شهر، وإنه مش عايز يطلقني عشان أنا أم ولاده."

رفض زواج زوجها من أخرى 

بسنت رفضت تمامًا فكرة إن زوجها يكون في حياة تانية مع واحدة غيرها، حتى لو وعدها بالمصاريف. "مش قادرة أستوعب إنه يتجوز واحدة أجنبية ويبعد عن ولاده. حاولت أقنعه إنه ده هيأثر على مستقبلنا، لكنه كان مصر."

رفع دعوتي خلع ونفقة بسبب زواجه من الأجنبية

لما أدركت بسنت إنها مش هتقدر تغيّر قراره، قررت ترفع قضية خلع ونفقة، خاصة بعد ما سافر من غير ما يسيب وراه أي التزامات واضحة. "رجعت القاهرة عند أهلي، وبربي ولادي لوحدي. صحيح هو بعت لنا فلوس مرة واتنين، بس ده مش كفاية. عيالي محتاجين أبوهم، وأنا كرهت حياتي بسبب اللي حصل."

أنهت بسنت حديثها في المحكمة وهي تحاول تلاقي حل يحفظ حقوقها وحقوق أطفالها: "الست الأجنبية دي خدت منه كل حاجة.. حتى قلبه".